Mal 2 | NdeIBE | STEP | “Manje-ke nanku owenu umlayo, lina baphristi.

Malachi 2

Ukukhuzwa KwabaPhristi

1 “Manje-ke nanku owenu umlayo, lina baphristi. 2 Nxa lingalaleli, njalo nxa lingalungisi izinhliziyo zenu ukuhlonipha ibizo lami,” kutsho uJehova uSomandla, “ngizaletha isiqalekiso phezu kwenu, njalo ngiziqalekise izibusiso zenu. Yebo, kuvele nje sengiziqalekisile ngokuba kalizimiselanga ezinhliziyweni zenu ukungesaba.

3 “Ngenxa yenu ngizabakhalimela abantwabenu; ngizalihuqa ebusweni ngomswane wemihlatshelo yemikhosi yenu lithathwe linjalo lisiya ekuthunjweni. 4 Ngalokho lizakwazi ukuthi ngilithumele lesi isixwayiso ukuze isivumelwano sami loLevi siqhubeke,” kutsho uJehova uSomandla. 5 “Isivumelwano sami wayelaso, isivumelwano sokuphila lokuthula, izinto engamupha zona; lokhu kwakuswela inhlonipho, lakanje wangihlonipha walesaba ibizo lami. 6 Imfundiso eqotho yayisemlonyeni wakhe njalo kakufunyanwanga lutho oluyinkohliso ezindebeni zakhe. Wahamba lami ngokuthula langobuqotho, waphendula abanengi ababesesonweni.

7 “Ngokuba izindebe zomphristi kumele zilonde ulwazi, abantu badinge kuye ukufundiswa – ngokuba uyisithunywa sikaJehova uSomandla. 8 Kodwa seliphambukile endleleni, kwathi njalo ngokufundisa kwenu lenza abanengi bakhubeka; lisephule isivumelwano loLevi,” kutsho uJehova uSomandla. 9 “Ngakho sengenze ukuthi leyiswe njalo liyangiswe phambi kwabantu bonke, ngokuba kalilandelanga izindlela zami kodwa latshengisa ukubandlulula ekusebenziseni umthetho.”

UJuda kathembekanga

10 KasilaBaba munye thina sonke na? Kasidalwanga nguNkulunkulu munye na? Pho singcoliselani isivumelwano sabokhokho bethu na ngokungathembani thina ngokwethu?

11 UJuda ukhohlisile. Kwenziwe amanyala ko-Israyeli laseJerusalema: uJuda useyitshaphazile indlu engcwele uJehova ayithandayo, ngokutshada lendodakazi kankulunkulu wabezizwe. 12 Leyondoda ekwenzayo lokho, lokuba ingubani, sengathi uJehova angayisusa emathenteni kaJakhobe – kungenani loba iletha iminikelo kuJehova uSomandla.

13 Enye into eliyenzayo nansi: Ligcwalisa i-alithare likaJehova ngezinyembezi. Liyakhala libubula ngokuba kasayinanzi iminikelo yenu, njalo kasayamukeli ngokuthokoza ezandleni zenu.

14 Liyabuza lithi, “Kungani na?” Kungenxa yokuthi uJehova umi njengofakazi phakathi kwakho lomfazi wobutsha bakho, ngokuba umkhohlisile yena eyingxenye yakho, umfazi wesivumelwano sakho somtshado.

15 UJehova kabenzanga baba munye na? Enyameni lemphefumulweni bangabakhe. Kungani bemunye? Ngokuba wayedinga inzalo ekholwayo kuNkulunkulu. Ngakho ziqaphele emphefumulweni wakho, ungaze wamkhohlisa umfazi wobutsha bakho.

16 “Ngiyakuzonda ukuchitha umtshado,” kutsho uJehova uNkulunkulu ka-Israyeli, “njalo ngiyayizonda indoda evala ngokuhlukuluza umkayo njengalokhu izivala ngesivunulo,” kutsho uJehova uSomandla. Ngakho ziqaphele wena emphefumulweni wakho, ungaze wakhohlisa.

Usuku Lokwahlulela

17 Selimdinisile uJehova ngamazwi enu. Lingabuza lithi, “Simdinise kanjani?” Ngokuthi, “Bonke abenza ububi balungile emehlweni kaJehova, njalo uyathokoza ngabo,” loba ngokuthi, “Ungaphi uNkulunkulu wokwahlulela kuhle na?”